張天賦獲五獎成大贏家負擔重 周吉佩相隔16年再踏港台頒獎禮

《第45屆十大中文金曲音樂盛典》日前舉行，眾多歌手現身獲得獎項。張天賦(MC)奪得「最優秀流行男歌手大獎」、「全球華人至尊金曲獎」、「最佳中文唱片獎」等五個獎成為大贏家，令MC忽然覺得自己責任重大：「就好似《世一》嘅歌詞中，被封榜首很難負荷，多咗個名多份壓力，必需要努力做多啲好歌，先對得住個名、有份投票畀我同鍾意我嘅人。」MC稍後忙於到廣州開騷，正積極操練身形。

女歌手方面李幸倪(Gin Lee)獲得「最優秀流行女歌手大獎」及「十大中文金曲」等三個獎，有呢個成績令Gin相當開心，不過Gin返到屋企就難以同愛貓「杏仁糊」分享喜悅，笑指貓咪每次見到佢收工回家都會走咗去或暱埋，仲未搵到有更好方法去解決同愛貓嘅相處。

王灝兒(JW)則獲得「優秀流行歌手大獎」，呢日雖然係佢宣布分手後首度出席公開活動，但見JW回復開郎笑容，心情未受影響，不過見佢喺台上唱歌時，要睇住手掌上嘅貓紙，JW笑笑口解釋：「因為啱啱忙完音樂劇，好多嘢要記，之後又去左廣州開騷，接住趕返嚟出席活動，真係唔夠時間背新歌歌詞，又驚自己出錯所以出貓，都知到台下好多歌手笑我。」仲自爆喺掌心噴咗定妝水，做足安全冇令歌詞被手汗霧化，真係鬼馬。

詹天文(Windy)同林智樂(Felix)兩位聲夢代表都獲得唔錯成績，先後獲「最有前途新人獎」銀獎及銅獎，Windy話知道新人獎喺每個電台只會獲得一次，佢亦錯愕得到銀獎，開心到要攬住個獎瞓覺，同埋會將獎項放於當眼地方不時鼓勵自己。獲獎亦係Felix心願之一，佢仲專登訂造個櫃擺放獎項。

因為參加TVB《中年好聲音》而再度活躍樂壇嘅周吉佩，則獲得「最佳進步獎銀獎」，令佢覺得好鼓舞，因為對上一之踏觸港台頒獎禮已經係2008年時做新人時候，所以今次唔單止係個人意義，仲代表住中年人嘅一份肯定，佢希望將獎項同中聲戰友及觀眾一齊分享。

同場嘅泳兒、曾比特、馮允謙(Jay)同獲「優秀流行歌手大獎」，阿Jay更同時獲得「十大中文金曲獎」以及「CASH最佳創作歌手獎金獎」，創作表現多年獲認同令Jay好感觸，佢希望繼續將擅長嘅一面創作帶到觀眾心中。泳兒則大讚團隊優秀，早前她到外地旅遊叉足電返港，呢日見佢狀態大勇。