張家輝雙喜臨門再添成就 憶拍處男執導作細膽要人陪睡

兩屆金像影帝張家輝又添喜事！日前家輝獲第7屆馬來西亞國際電影節（MIFFest）公布成為今屆「卓越電影成就獎」（Award for Excellent Achievement in Film ）得主，而家輝新作《贖夢》更會成為電影節閉幕電影！

張家輝獲頒第7屆馬來西亞國際電影節「卓越電影成就獎」。

對於電影繼烏甸尼遠東電影節，及韓國富川國際奇幻影展後，再次獲外地影展垂青，加上獲大會頒發「卓越電影成就獎」，家輝深感興奮：「首先都一定係要多謝唔同影展嘅選片委員賞識，都係果句：『人哋畀面，我就好好收起嗰面佢！』感謝自己嘅團隊，日後繼續努力。同時亦感激大會對我喺電影業嘅認可，如時間許可下，亦一定親身赴會。」而大會則讚揚家輝演技精湛，多部精彩作品成功擄獲觀眾的心，同時作為導演嘅佢擁有卓越敍事能力，肯定家輝多年來對電影業嘅貢獻同影響力。
 家輝新作《贖夢》亦成該電影節閉幕電影。
家輝感恩再次得到馬來西亞同業及影迷厚愛，加上佢首部執導作品《盂蘭神功》就係喺當地拍攝。相隔10年，家輝帶住自己第四部自導自演作品再到大馬，又雙喜臨門獲邀參展及獲得成就獎，真係別具意義！家輝亦笑談當年處男執導趣事：「當時喺富有神秘色彩及濃厚文化嘅馬來西亞拍攝鬼片，令影片更具感染力。但因自己怕鬼，一度要搵『陪瞓』，不過自己對影片感到滿意。而今次嘅《贖夢》就只係關於心理、驚慄，同鬼無關，收工可以返屋企瞓，所以好好多，哈哈。」
 家輝坦言唔敢對票房有太大期望。
雖然電影未正式上映已經獲各地影展關注同支持，問但家輝坦言未敢對票房有太大期望，亦以幽默口吻分享對現時電影市道看法：「電影就係咁神奇，集創意、藝術、賭博及命水於一身，簡單嚟講：偏門！近年又大多手風唔順！所以仍然喺業内努力打滾嘅人，其實都深愛電影，亦包括我！而票房成績，喺度引用我自己嘅一句對白：『耶穌都估唔到票房，我話嘅！』總之，立意求新，交出誠意，謹慎行事，自求多福係啦。」