九龍城寨之圍城｜幕後功臣謝票告別九展 導演鄭保瑞爆片中小秘密

公映後口碑不絕嘅《九龍城寨之圍城》上映踏入2個月，唔止全球總票房邁向9億港元，更成為自2013年起有記錄以來，香港電影最高入場人次記錄，截至6月30號，入場人次已高達159萬人次入場，同時亦係有記錄以來中西片入場人次第二名。

導演鄭保瑞、原著小說作者余兒、監製莊澄同胡子彤謝票告別九展

而截至6月30號，《城寨》嘅港澳總票房已突破1億700多萬港元，直逼1億1千萬港元票房大關，有力挑戰累積票房1.15億嘅《毒舌大狀》帝位。

電影監製莊澄、導演鄭保瑞、原著小說作者余兒，日前就趁一代地標九龍灣國際展貿中心告別日，到現場戲院謝票，《城寨》亦成為星影滙最後放映嘅電影，團隊同數百名入場觀眾合照留念，鄭保瑞指：「經歷過好多首映，我有時會喺呢度做試片，要改建當然有不捨，好似我哋齣戲『離不開、留不低』，呢個就係香港特色。」

團隊又同入場觀眾齊齊合照

當日導演亦分享唔少戲中小秘密，鄭保瑞話：「拍攝過程劇本不斷調整，王九吞劍係幾個後生仔諗出嚟，佢哋諗王九咁利害，點先可以打贏佢，我思考點拍期間，子彤同劉俊謙佢哋討論後同我講，佢哋想將一把刀飛入王九口中，因為王九嘅罩門就喺口中。我仲鬧佢哋含着刀點拍？經過細心思考先發覺可行。」

導演仲爆出王九嘅罩門所在，正正式係幾位年輕演員討論嘅成果

鄭保瑞仲透露，雖然古天樂飾演嘅龍捲風已死，不過希望整齣戲包含龍捲風精神，所以神奇時刻「龍捲風」出現，將事件局面扭轉：「一塊很大嘅布被大風捲起，呢個設計令大家領悟到人唔喺度精神都長存。」

古仔扮演嘅龍捲風中段已死，不過仍以巧思繼續存在

監製莊澄亦都話：「古天樂拍攝前問我，佢中段就死咗，劇情點能發展落去？我同佢講話要相信導演，你死咗之後，精神仍然可以永存。」