鄧麗欣含淚感謝fans支持 承諾今年將推出新歌

鄧麗欣Stephy出名寵粉，為慶祝歌迷會成立17周年，日前佢就與逾百位fans一齊慶祝。活動當日大家除咗玩得盡興外，fans亦坦誠向Stephy道出心聲，當中有唔少歌迷希望佢盡快開個唱同推出新歌。有來自澳門、首次同Stephy見面嘅歌迷，眼濕濕咁話每聽Stephy填詞嘅《黑白照》都會感動落淚。
Stephy同fans玩得好開心。
而喺眾多作品入面，《蘋果》亦係唔少歌迷嘅心頭好；有人更笑指Stephy嘅《中華冷面》非常吸引，期望佢可以考慮跳唱新歌，而身為主角嘅Stephy，就話已經將大家嘅心聲收下，仲話會盡快用作品回饋粉絲。
 聚會當日除咗玩之外，Stephy仲同fans互換心事。
聽完fans嘅盡訴心中情後，Stephy亦感性地多謝fans多年嚟嘅陪伴與支持，佢哽咽咁話：「真係好開心！儘管你係17年都喺度陪住我還是第一次嚟都好，真係衷心感謝每一位，多謝大家嘅陪伴。其實我都都陪伴住大家畢業好多次，由小學畢業到而家博士，好犀利！」
Stephy睇住fans長大。
Stephy指自己會以成績同努力去報答fans嘅支持，又指自己經歷咗多年嚟嘅高高低低後，愈嚟愈識得去珍惜愛自己嘅人：「你哋成日講無論任何事都會支持我、陪伴我，我愈嚟愈感受到，除咗家人，我真係諗唔到點解會有一個人係會無條件去支持一個人，但你哋做到，我真係好感動！我都會無條件地付出我嘅努力，唔會令大家失望，希望你哋會為我感到驕傲，今年內真係有新歌嘞！大家期待我嘅電影、電視劇同新歌啦！用作品說話！」
 Stephy承諾今年會出歌。
當被問到而家嘅Stephy開心嗎？佢諗都唔使諗話自己好開心：「快樂係嚟自好多嘢，除咗我愛我嘅工作，生活都好重要，大家見到我都會去吓旅行，我都幾識得生活架，只要做到我鍾意做嘅嘢，享受生活，我係絕對開心快樂，大家可以放心，希望大家都一樣，最緊要愛鍚自己。」