SUPER JUNIOR-D&E澳門見面會冧爆歌迷 東海、銀赫齊齊賣萌扮可愛

韓國男團SUPER JUNIOR成員東海、銀赫組成嘅小分隊SUPER JUNIOR-D&E喺澳門舉行嘅見面會日前圓滿落幕。東海、銀赫以最新迷你專輯嘅歌曲《ROSE》為見面會揭開序幕，亦送上大熱主打歌《GGB》，將氣氛推至高潮。
 東海、銀赫以最新迷你專輯嘅歌曲《ROSE》為見面會揭開序幕。
兩位解釋今次粉絲見面會主題，就係想由他們同歌迷透過唔同環節一齊去搵當中隱藏嘅 ‘CODE’(代號)，所以亦有唔少令大家從中更了解佢地兩個嘅環節。
 東海戴上卡通人物髮箍。
東海、銀赫首先喺見面會上同大家分享佢地抵達澳門時所拍攝嘅相片，無論係搭飛機到澳門裝扮、所食嘅食物同收到嘅禮物等都有一一紀錄。隨後，兩位大玩遊戲，輪流提出同自己相關嘅題目，等對方同歌迷解答，考驗彼此嘅了解程度，包括大家可以從問題中得知東海最近沉迷健身，而銀赫最近就沉迷煉奶咖啡等。最後遊戲由東海答啱最多，亦係比較了解銀赫。輸方銀赫要接受嘅懲罰就係要戴上兔耳髮箍同貓爪手套等道具做出可愛Pose，而佢亦為東海挑選卡通人物髮箍，兩位對粉絲擺出心心甫士，令粉絲大呼可愛。
 銀赫要戴上兔耳髮箍同貓爪手套等道具做出可愛Pose。
而喺另一個遊戲，兩位大飽口福！因為就係要佢地試食澳門地道食物或零食同飲品，但食嘅時候需保持最低聲量，結果銀赫食薯片同飲檸檬茶時發出嘅聲音分貝較高，令佢再度落腋，要因應隨機播出嘅歌曲跳出可愛舞姿。最後佢分別跳出Super Junior 嘅《Devil》和近期大熱歌曲《麻辣糖葫蘆》等舞蹈，令現場粉絲超驚喜。
 兩人冧爆在場fans。
見面會尾聲，兩位同全場粉絲大合照時，現場突然熄燈，原來係播出粉絲們為佢們送上嘅應援影片，令兩位超級感動。最後向大家送上《Oppa, Oppa》為見面會畫上完美句號。