容祖兒向霆鋒自薦做打女不果 回應與內地導演李璇緋聞

容祖兒、周秀娜、林峯、星二代沈月等一齊現身品牌活動，Joey 同阿峯雖然好耐無見，但佢都有留意阿峯有份主演嘅新戲，更大讚阿峯喺電影嘅演出，仲自薦話自己打得吓，可以做「王九」伍允龍嘅妹妹，Joey話佢睇呢部戲時，緊張到腳趾抓地，睇完佢話自己都好似打完一場交咁攰，佢仲話曾經向謝霆鋒自薦做打女，可惜對方視而不見，Joey唯有知難而退呀。

講到最近有傳Joey同內地女導演李璇交往，引起雙方粉絲網上罵戰，Joey表現輕鬆大方回應：「唔係緋聞嚟架，係朋友嚟，網上通常都會有呢啲小風波，時間慢慢就會沖淡，我哋又唔駛太擔心。」

即將喺澳門開騷嘅林峯，正計劃巡迴演出，仲公開誠邀曾經合作MV女主角周秀娜開金口做嘉賓，阿峯仲話想同娜姐合唱，不過，娜姐就似乎對唱歌無咩信心，仲話唔想影響阿峯嘅演出，阿峯即刻為娜姐打強心針，大讚對方把聲有磁性。

已經做咗Model兩三年嘅沈月，就話平時都會同妹妹、媽媽交換衫著，至於有無打算拍戲？沈月就話暫時無呢個考慮，不過就話唔少導演都揾過佢，但由於家人都唔想佢太大壓力，所以佢話暫時都未諗住闖影壇呀。