明愛暖萬心｜節目圓滿結束 歌手傾力演出傳遞愛

《明愛暖萬心》慈善晚會7月6日圓滿舉行，一眾歌手傾力演唱傳遞愛，好似 譚輝智 古淖文 周吉佩 李佳 曾比特 鍾柔美 任暟晴 陳潔靈 鄭俊弘 涂毓麟 黃洛妍 泳兒 許靖韻 王灝兒 同埋 方皓玟 等先後演出。

輝智同阿古再度合作，兩人演繹《愛是永恒》同埋《領悟》兩首歌，默契十足嘅佢哋，彼此惺惺相惜，講到早前關嘉敏神還原譚輝智，阿古都大讚真係好似，而輝智都驚嘆一個女仔竟然可以扮到誇張嘅似，真係絕﹗佢仲話一對仔女都認錯爸爸呀。

而李佳同周吉佩呢晚一齊演繹《陪著你走》，嚟緊吉吉將會赴馬來西亞宣傳《中年好聲音3》，吉吉話好期待可以同大馬嘅粉絲一聚。而曾比特呢晚就同兩位美少女鍾柔美同埋任暟晴合唱《一個都不能少》，Mike話演出前，曾經好擔心會忘記歌詞，好彩最後都順利完成，而演出當日，任暟晴亦啱啱收到IB放榜成績，佢話都好滿意自己嘅成績，仲話而家終於可以放下心頭大石啦。

而陳潔靈就率領鄭俊弘、涂毓麟、黃洛妍一齊演唱《千個太陽》，有機會同Miss Chan Chan同台合唱，Janess同埋Oscar都覺得好榮幸，Janess仲話好希望再有合作機會。之前曾經一齊拍過廣告嘅JW同小明，呢晚終於有機會喺音樂上合作，佢哋都話緣份嚟到啦，呢晚見小明身形非常瘦削，令人擔心佢會唔會過輕，JW就幫小明澄清，話佢其實食好多嘢，而小明亦都話佢嚟緊會努力增磅，叫大家唔駛擔心呀。