胡定欣為演出加操練歌 關嘉敏再遇譚輝智即舞癮起

胡定欣、尹光、中聲唱將譚輝智、劉威煌同梁浩賢等，呢日為一個國慶音樂會演出，除咗獲得fans支持外，一眾街坊都聽得相當開心。

定欣早前演出《破毒強人》入選最佳女主角
為咗呢次演出，定欣有加操練歌，演出時定欣仲相當識搞氣氛，落台同一眾街坊作近距離接觸。定欣日前憑《破毒強人》喺「2024 亞洲影藝創意大獎」中獲得香港地區嘅最佳女主角，而嚟緊12月嘅頒獎禮度，佢仲會同其他地區嘅女主角，角逐終極視后殊榮。對於獲獎定欣就話好驚喜，因為《破毒強人》已經係上年嘅劇集，估唔到今年會有份提名，但佢就話未知到時會唔會出席個頒獎禮喇。
劉威煌呢日亦係表演嘉賓之一

呢日關嘉敏亦有份演出，自從佢喺《福祿壽訓練學院》入面神複製輝智後，大家都覺得佢哋好似樣，現場仲有唔少fans搵佢哋兩個一齊集郵，佢哋一齊接受訪問時，輝智仲讚關嘉敏keep到仲有咁似樣，而關嘉敏就指因為當時自己真係練咗好多，所以神情各樣已經入晒骨，講講吓佢仲即場輝智上身跳返兩下舞，相當惹笑。

真假輝智呢日亦同場出現