蔡潔興奮領取台慶電動車 笑指多人預訂上車沾旺氣

上月喺台慶幸運地抽中電動車嘅蔡潔，終於都可以收車喇！呢日佢忙住興奮嘅心情去到車行，見到自己架新車仲急不及待要上去坐坐試下手感呀！
蔡潔呢日去領獎。
未曾試過揸電動車嘅蔡潔，笑言自己即將開啟一個新嘅駕駛體驗，佢又指自己平日鍾意揸車周圍去，加上工作嘅性質，係非常需要有架車代步。蔡潔指自己當年留學時，就買咗自己人生第一架車，當時佢就已經好鍾意揸住車周圍走，佢覺得架車可以帶自己去到唔同嘅地方體驗一下，特別係自己需要沉澱情緒時，有架車真係好重要，除咗可以喺車上聽歌放鬆外，又可以載埋好友外出用餐等。

蔡潔指今次可以抽中電動車，都係多得胡定欣抽中自己，所以佢就預咗載對方去食飯，同時亦有唔少朋友報名要上車沾下旺氣遊車河，所以佢都話要好好安排一下時間。
坐上抽中嘅電動車，蔡潔表現得相當開心。
下月19號就係《萬千星輝頒獎典禮2024》嘅大日子，問到佢有冇信心可以keep住呢份幸運？蔡潔就話佢嘅fans好好，每日都會message佢話佢知大家投咗票，同時亦有為自己拉票，叫埋朋友一齊投，蔡潔話以上種種都已經令佢覺得好感動，因為作為演員除咗演好角色、接到好劇本外，得到大家認可佢哋演嘅劇集同角色，有呢啲回饋佢已經覺得好幸福。蔡潔話自己都會好好咁回報大家嘅支持同付出，所以嚟緊頒獎禮佢會精心準備，着靚靚留個好印象畀大家呀！
蔡潔