愛·回家之開心速遞丨劉丹歡迎姚焯菲隨時加入 何晉樂要求大小姐真搣面珠

處境劇《愛·回家之開心速遞》日前換上新片頭同主題曲，一眾演員齊集欣賞全新主題曲嘅MV同花絮，大家睇得開心之餘，仲勾起當日嘅搞笑事，KC歐瑞偉仲即場示範MV中高難度動作，不過對手由Terry李偉健變成三太樊亦敏，KC話非常榮幸可以抱起三太。

MV需要群舞熱鬧場口，跳得咁齊，大家都話全靠龍家同熊家兩位首領，丹爺劉丹話跳舞對於大四喜嚟講係毫無難度，單立文笑指阿哥茶舞、晚舞通宵咁跳，滕麗名話當日係跟住丹爺舞步去跳，丹爺讚大家都好醒，後排不停跟前排跳，若果前排錯就跟住一齊錯，但望落去就好齊咁。丹爺又話無任歡迎姚焯菲隨時加入熊家嘅大家庭，阿滕話點入都得，亂入都得。

新加入大家庭嘅何晉樂，喺最近一集不停被大小姐林淑敏搣面珠，原來當日阿Rock係要求吓吓真搣，呢種直率投入，令林淑敏都大讚尊業，阿Rock解釋驚自己唔識畀反應，所以由綵排開始就要求真搣。