StarTalk一氣呵成版｜羅毓儀獲吳若希提攜圓夢 自爆小六至今身高無增長

羅毓儀 入行後演戲唱歌雙線發展，除咗自己組Band之外，喺機緣巧合下獲得貴人相助夢想成真，呢日Yuki就應邀到到《星光路上》接受主播 許文軒 專訪，細訴入行經過同發展路向。

Yuki細細個已立定志向闖音樂路，於小六畢業時參加過舞台劇演出後，發覺自己對演戲都有好大興趣，雖然當時並未能順利當上女主角，但Yuki笑指當時小六佢係最高一位學生，身高同現時一樣冇再高過，加上佢由細到大都好鍾意睇TVB，更自稱係電視精，所以讀完書就投身讀藝訓班，畢業後為節目《姊妹淘》擔任模特兒時認識吳若希Jinny，獲對方邀請拍攝MV後，更直接提攜佢唱歌，令佢實現夢想，所以Yuki至今對Jinny仍心存感激。

Yuki自細已經對音樂有非常大興趣

Yuki先後推出三首不同風格歌曲，包括《完璧》、《我係小忌廉》同《日落時》，其中有機會同著名音樂人Him Hui合作，Yuki都有講解三首作品嘅分別，以及喺錄音過程中遇到嘅困惑。而講到平日練習結他同唱歌，Yuki笑言以前會自己喺屋企房間練習，但慢慢就會孭住支結他，喺屋企走出廳邊彈邊唱，最初家人都嫌佢好嘈，但慢慢接受咗佢，由行走的翻版CD漸變成行走正版CD，過程好有趣。

已經先後推出幾首歌嘅佢，仲曾被家人嘲笑係行走的翻版CD

其實喺唱歌嘅同時，Yuki都一邊忙於拍劇，喺《下流上車族》、《神耆小子》及《愛·回家之開心速遞》中佢出演嘅角色令人留下深刻印象，但點樣做到成功雙線發展？同埋Yuki對將來嘅事業路又有咩規劃同想法呢？想知更多敬請留意訪問內容聽吓佢點講啦。

Yuki喺《下流上車族》嘅生鬼演出令佢閃電入屋