吳慷仁被轟為女友拒與柴智屏合作 澄清不實兼睇好陳柏霖更勝金宇彬

台灣演員吳慷仁近日被發現喺私人社交帳號發文炮轟知名製作人柴智屏，指婉拒參演對方監製、翻拍自韓劇由金宇彬同申敏兒主演嘅《我們的藍調時光》後，柴姐借事件做藉口叫停新作拍攝，現在落實由陳柏霖、郭雪芙做主角。

事後有指，慷仁係為女友邵雨薇曾被柴姐要求除衫試鏡而不滿拒絕合作，不過雨薇喺報道之後都有發文否認。慷仁現身台北一個慈善活動時亦作出澄清，話佢同女友看到消息後都好愕然，當時兩人還未認識，女友也從沒提及此事，若果當時相識他也會贊成，因為作為一個演員做正常試鏡程序，背後又有專業團隊，不存在會有這個反應，甚至覺得雨薇當時為了爭取一個角色係值得鼓勵的事，換轉自己也會照這樣做。

慷仁表示婉拒柴姐是因為夾唔啱期，但對於在私人帳號抒發心情突然被傳媒拎去大做文章，更傳出其他傳聞，令佢感到無奈又不解，佢借一個舊廣告做比喻，例如一直講緊世界末日，但一人傳一人，最後係變咗貓在鋼琴上暈倒，理解到人雲亦雲好恐怖，到最終呈現並不是真相，有點浪費時間。

另一方面柴智屏都有發文回應事件，解釋延期拍攝係為了有更完善準備，要孭責任嘅係佢本人，冇諗過要推卸責任。慷仁對此認同，沒有演員想影響團隊拍攝進度，大讚柴姐處理手法，又大方鼓勵主角，沒有一個角色只能一位演員做，不同演員會有不同樣子同感覺，甚至比韓版更好。