小S深夜醉後出Po：少了一個女兒 不捨大女美國留學感性落淚

台灣女星小S(徐熙娣)13日凌晨，突然喺社交平台限時動態連出3條短片，講到大女Elly即將出發到美國讀大學，佢講講吓就突然痛哭落淚，仲話：「這樣就少了一個女兒…。」見到檯面擺住酒杯，好明顯小S喺酒後吐心聲。

小S嘅長女Elly即將出國留學

條片開始就聽到小S模仿時鐘嘅滴答滴答聲，跟住話：「再過不久，也不能說離開我啦，她還在這個世界上，只是……就是…我也不知道我到底會怎麼樣」。佢仲話平時大女煩住佢，就會好想佢快啲走，但一諗到佢真係就快離開，就忍唔住想喊，短片仲配上「媽媽蹩腳的獨角戲」，sell溫情之餘都不忘搞笑。

呢日小S就Po出不捨女兒嘅影片

而一向古靈精怪嘅許老三就係鏡頭外吐槽話：「媽媽，你MV裡演得比較好」，搞到小S激動回應話呢一刻係真實生活唔係做戲，之後佢又對住鏡頭話；「但是我覺得還是開心勝過難過，我希望她展翅高飛」，講完又掩面皺眉，似喊又似笑。

又嫌阿女煩又唔捨得，相信係唔少父母嘅心情

據知小S因為唔捨得大女自己一個前往美國，計劃向節目《小姐不熙娣》請假半年陪愛女一齊去美國，不過節目組最後只批准一個月假，所以小S陪大女安頓好就要離開，放手俾大女學獨立。