冠佑鳥巢開騷收外母離世噩耗 愛女小玫瑰新歌獻摯愛婆婆

五月天鼓手冠佑17歲囡囡「小玫瑰」劉芯妤，13日喺社交平台公開新歌《微笑說再見》MV，獻俾摯愛嘅婆婆，原來小玫瑰嘅婆婆，即係冠佑外母已經喺5月尾離世。

小玫瑰分享錄音過程，佢話自己5月27日錄完新歌，隔兩日婆婆突然傳出噩耗，佢喺學校收到電話之後即刻陪媽媽返婆婆屋企：「在車上我們不敢跟媽媽說話，無處可躲的她就像小孩在我們面前大聲哭泣，那一天我永遠不會忘記，直到看見了睡夢中離開我們的外婆。」

而當時五月天正喺北京鳥巢開騷，敬業嘅冠佑強忍悲傷情緒完成演出，工作結束後即刻飛返台灣，一見到太太二人緊緊相擁，小玫瑰話，嗰日係佢第一次見到爸爸喺佢面前喊。

雖然婆婆臨終前未能聽到呢首新歌，不過小玫瑰都希望以呢首歌同婆婆做最後告別，「今天是我們約定好的日子，要和我們一起聽喔，外婆，我永遠愛您。」而MV中亦有冠佑背影入鏡嘅畫面。