剪裁魔法師｜胡定欣袁偉豪任主持 張馳豪做Model行Catwalk超興奮

香港電視史上，首個推廣本地時裝設計師才華嘅真人騷《剪裁魔法師》，呢日舉行拜神儀式，除咗節目主持人 胡定欣 同埋 袁偉豪 之外，擔任模特兒嘅 張馳豪 郭珮文 刑慧敏 李爾晨 同埋 王嘉慧 都有現身。

而呢次節目更揾嚟潮流達人蘇永康、Amanda S.以及Ricky Kwok擔任評判，對於有份主持呢個咁創新嘅節目，定欣同阿Ben都覺得好有新鮮感，定欣話已經拍咗準決賽外景版，今次決賽就移師錄影廠進行。曾經合作過《城寨英雄》嘅兩位，呢次第一次拍檔做主持，阿Ben同定欣都話慶幸唔係Live Show，否則挑戰更大，不過喺說話談吐以及節奏上，佢哋都話要有所調整同適應。

而圈中唔少藝人都有擁有model身形，呢次張馳豪同李爾晨都可以客串做下model行下catwalk，兩位都話係一個特別嘅體驗，Aska呢日嘅髮型，望落去真係好潮，不過佢就話呢個髮型要時刻保持平衡，唔可以前後搖擺得太勁，而首次行catwalk嘅佢仲話好興奮添。