譚詠麟獲好友提早慶祝生日 順道祝賀勇奪國際發明展金獎

8月23號係校長譚詠麟嘅正日生日，相識滿天下嘅佢，每逢踏入七月就陸續出席朋友為佢而設嘅生日飯。前日（15號）校長就收到今年第一個生日蛋糕，佢話今年生日願望係世界和平，家人朋友都身體健康。

講到身體健康，校長唔係得個講字，因為佢有份投資嘅創科公司，對於治療皮膚等相關問題有相當貢獻，因此獲得第49屆日內瓦國際發明展金獎，仲有份出席創新科技署喺16號舉辦嘅「2024年創新科技獎項嘉許禮」，雖然校長早於88年話唔再攞獎，但今次能夠獲獎，校長都好開心，因為相關發明真係幫到人。

出席完嘉許禮後，校長就以大使身份參與「2024年世界青少年合唱節暨第一屆大灣區合唱節」開幕禮同擔任表演嘉賓，聯同超過100位青少年同台合唱《朋友》同《To Love Somebody》。