譚校長將生日後輩預早慶祝 Mr.成員罕合體周五廣州開騷

8月23號就係譚詠麟嘅 74歲生日，例牌會同大批好友聚會嘅佢，就已經開始今年嘅連場慶祝活動，頭炮仲係當年曾受譚校長祝福；即將再次合體嘅Mr. 成員 Ronny(黎澤恩)MJ(譚傑明)同Tom(杜志烜)。

Mr.幾位成員同唱片公司同事為譚校長預祝生日

早喺2008年已經成軍嘅Mr.，月前先低調於社交平台慶祝成立16周年，當年一首《如果我是陳奕迅》唱響樂壇地位，更曾三度登上紅館舞台開騷。而星期五Mr.就會於廣州合體舉行演出，不過就獨欠Alan嘅參與。

Mr. 成員2019年後「停運」各有發展，呢晚有現身飯局嘅Ronny近年屢有幕前參與戲劇演出，好似早前播畢嘅《新聞女王》、《反黑英雄》中都有扮演反派。而MJ近年轉形成為專業紋身師傅，社交平台Post滿佢親手繪製嘅作品。

Ronny不時都會於唔同劇集中現身MJ則醉心於紋身生意

至於鼓手Tom則開設音樂學校，佢早年迎娶模特兒太太何思諺後誕下一子，乖仔更「子承父業」盡得Daddy真傳習鼓。而Dash(譚健文)早前被爆出年前發現患有鼻咽癌，近年投入到學校分享生命見證﹐亦忙於自己嘅飯糰生意。至於主音Alan(布志綸)以個人身份簽約唱片公司，繼續推出唔同歌曲，亦有教授流行聲樂。