林穎嫺不時惹狂峰浪蝶 與歐信希齊分享逆齡秘訣

87年港姐季軍林穎嫺，日前同歐信希一齊現身一個活動，佢哋兩位雖然已經五十幾歲，但係望落去真係完全唔似，阿Wing仲話自己而家喺街上，都仲會有人搭訕請佢食飯，兼問佢結咗婚未? 其實阿Wing嘅三個小朋友都大晒啦，囝囝亦都讀緊大學，阿Wing仲Keep得咁好，難怪會惹咁多狂蜂浪蝶啦。
林穎嫻同歐信希一齊出席活動。
至於歐信希，雖然仲係單身，但係佢就話好嚮往自由嘅生活，所以即使未遇到合適對象都唔心急，至於佢哋兩位究竟點樣可以保持逆齡狀態? 阿Wing就話最重要係由內到外保持健康，好似做運動、適當飲食兼睡眠充足，歐信希都大表認同，佢仲話要將煩惱或者唔開心嘅事盡快拋開，令自己心情開朗。
林穎嫻話自己冇退出過。
問到阿Wing有無打算復出？阿Wing就搞笑回應：「我從來都無話退出，咁點會有復出呢？」阿Wing表示對未來工作抱隨緣態度，有適合都會接，亦可以藉此同朋友聚下，阿Wing得悉歐信希，嚟緊十月會舉行生日會，佢就自薦話做嘉賓，仲提議同歐信希可以一齊合唱添。