主播賴彥妤推心靈健康著作藝人撐場 支嚳儀未聞龍婷感情李龍基帶新書予未婚妻

書展正式開鑼，今年我哋嘅主播 賴彥妤 亦都推出以身心靈健康為主題嘅著作，呢日 支嚳儀 李龍基 黃洛妍 鄧伊婷 都有到現場支持，基哥仲話已將呢本新作帶俾正被監禁嘅未婚妻 王青霞 ，仲話希望佢睇睇新書參透吓。

基哥又透露目前每個月只可以探監兩次，見面次數減少亦無法改變，唯有耐心等待對方出獄。而日前演唱會突然宣佈延期，呢日佢指係準備時間不足嘅原因咁話。

龍婷同資深演唱會製作人被傳媒指車廂密會親嘴，雙方已經先後作出回應，而Venus呢日就話已傳訊息問候戰友，不過一向甚少問及對方嘅私事同感情，平時多數傾唱歌問題。即將推出新歌嘅佢，仲話全神貫注新歌準備呀。

而基哥則指Hello Kiss非常平常，仲即場示範咀嘴採訪記者呀。至於終於完成撰寫新作任務嘅Vivienna，就話多得唔少朋友幫忙先可以成事，其中一位就係幫手作曲嘅創唱歌手 何展睿 喇。