劉可林思彤為社區活動任開幕嘉賓 《中聲3》開季親身貼士供參加者參考

《中年好聲音》轉眼已經開始第三季賽事，而升任師兄師姐嘅中二生 劉可同 林思彤 ，日前就為一個社區活動擔任表演嘉賓，一班「可粉」仲早早到場打氣，「牛河」亦同大家齊齊合照。

劉可同林思彤應邀擔任一個社區國慶活動嘉賓
唔少香港人都喺公並屋邨生活，而身為黃大仙行坊嘅劉可就大讚公屋設施非常便利，居所附近仲有齊醫院、學校同商場，應有盡有咁話。至於思彤嘅婆婆同媽咪同樣都居於公屋，佢同樣覺得現代公屋設備非常完善。
居於黃大仙嘅劉可大讚公共屋邨配套一流

提到《中年好聲音3》正式展開，身為上屆畢業生嘅林思彤就提到唔少貼士：「我永遠叫佢哋一定要保暖， 因為錄影廠太凍，尤其係開頭嗰幾round比較辛苦，因為太多人，等候時間長，所以一定要帶夠衫同埋暖水壺，呢個係最實際。」
林思彤就為正式展開嘅《中聲3》參加者提供貼士

至於劉可就提醒參賽者要盡量放鬆：「要做嘅所有功夫喺上台前已經做曬，上到台真係要放鬆，就算係殿堂級歌手，當on show嗰一下每個人都會緊張，點樣克服緊張就要慢慢適應同學習，呢個亦係必備嘅人生課題。」
佢哋仲認為輕鬆面對負評非常重要

而比賽期間外界嘅批評，佢哋就有唔同睇法，林思彤話：「如果係純粹個人睇法，自己就會將佢變成幽默化，唔使太在意。」而劉可就坦言每一集都有唔少負評：「帶有政治性意圖或人生攻擊 可以撇除唔去諗，始終唱歌太主觀，有時係平衡唔到，只要唔係甩beat甩得太犀利，唔係走音走得太犀利，可以喺合格線上完成首歌，係可以接受嘅，總之唔好將得失睇得太重。比賽期間會有好多溝通交流，當中可以學到人哋身上嘅嘢，所以追夢對於自己唔係最主要，喺呢個人生課程自己有何得著先至最寶貴。」

最近龍婷嘅緋聞成為焦點，劉可就笑言：「耳聽未必為虛，眼睇未必為實，呢啲以訛傳訛，我真係唔知。」至於有指爆料人係支嚳儀，林思彤就指相信Venus為人咁話喇。