周杰倫睇網球賽孖湯告魯斯搭晒膊頭 網民大讚巨星夢幻組合

周杰倫同昆凌結婚9年育有兩女一子，一家五口幸福甜蜜，近年周董刻意放慢工作腳步，享受家庭樂，近日佢就同太太昆凌現身溫布頓網球公開賽決賽，周董親自po出同湯告魯斯嘅合照，堪稱係中西巨星夢幻組合。
周杰倫同昆凌現身溫布頓網球公開賽決賽。

由周董喺IG分享嘅合照中見到佢同昆凌著住同色系情侶裝，戴住黑超，企喺兩公婆中間嘅就係荷李活巨星湯告魯斯（Tom Cruise）。靚佬湯著住紫色西裝，佢同周董唔止搭晒膊頭，仲伸出手指互相指住對方，笑得非常燦爛，睇得出心情大靚。而周董更開心寫低：「Mission Impossible at Wimbledon！Everything is possible（不可能的任務在溫布頓！一切皆有可能）。」

周杰倫同昆凌結婚9年育有兩女一子，多年來依然非常恩愛。

除咗同靚佬湯合照，昆凌仲喺限時動態po出同「奇異博士」Benedict Cumberbatch嘅合照，兩張相昆凌著住同一套衫，估計應該係同一日集郵成功。

昆凌此行仲喺限時動態po出同「奇異博士」Benedict Cumberbatch嘅合照。

除咗現身溫布頓決賽，周董兩公婆近日分別喺IG po出好多靚相，睇得出佢地好享受呢個假期，好多網民仲留言大讚周董外表回春，瘦咗又後生咗，同昆凌越來越有夫妻相添！
周董獲網民讚外表回春，瘦咗又後生咗。