周吉佩自爆K房對太太一見鍾情 預告年尾開個唱騷六嚿腹肌

《中年好聲音》冠軍周吉佩日前作客譚玉瑛、何基佑同麥皓兒主持嘅電台節目，原來吉吉太太黃彥欣（Louise）同麥皓兒係同屆港姐，所以吉吉同麥皓兒已經相識多年，今次以唔同身份重遇，二人感覺既新鮮又熟悉。

吉吉同麥皓兒已經相識多年，今次以唔同身份重遇，二人感覺既新鮮又熟悉。

訪問中阿譚問到吉吉當年拍拖喺邊個主動，吉吉竟然大爆：「其實係港姐追我，講笑啫！我係09年透過朋友聚會認識我太太，最重要我哋兩個係同一日生日，唔一齊唔得。」吉吉話當初有諗過揀生日結婚，但自己好注重儀式感，唔想少咗一個重要紀念日。二人拍拖第五年結婚，至今已經攜手度過14個年頭，婚後誕下一子一女，一家四口非常幸福。

吉吉太太黃彥欣同麥皓兒係同屆港姐。

吉吉新歌《Falling for you》MV有部分情節取材自佢同太太嘅真實故事：「當年我第一眼見到我太太喺卡啦OK房，個場景暗暗地，又有啲射燈，佢一開門有啲風吹起佢啲頭髮，好有女神feel，我就將呢一幕放入MV。」

周吉佩自爆K房對太太一見鍾情。

訪問中吉吉透露今年12月將舉行首個個人演唱會，仲預告一定有跳舞環節，不過六嚿腹肌就仍然有待努力，「我有個畫面好想做，就係除咗件衫孭住支結他喺到彈，懶係型咁。不過我都係盡量去做，唔敢肯定，練到就有，冇就畀手臂大家睇」。

吉吉透露今年12月將舉行首個個人演唱會，仲預告一定有跳舞環節。