許茹芸喪母兼患病延期開騷 幸有老公幫助走出傷痛

台灣情歌天后許茹芸今日喺社交平台出Post，宣告患有帕金遜病16年嘅媽媽離世嘅悲痛消息，「直到今天，我才開始慢慢消化」，難以接受媽媽已離開呢個事實。
 
許茹芸今日喺社交平台出Post，宣告患有帕金遜病16年嘅媽媽離世嘅悲痛消息。

茹芸表示當時正忙於綵排北京演唱會，結果媽媽突然入住加護病房，而兩母女明明喺事發前幾日先一齊食飯。本身茹芸以為靠工作麻痺自我，母親離去之痛卻絲毫未減，茹芸喺兩星期前突然感染急性咽喉炎，被迫延期原本7月13號寧波演唱會，茹芸形容「這真是壓碎我的心最後一根的稻草⋯」
 
茹芸難以接受母親離世嘅消息，而兩母女明明喺事發前幾日先一齊食飯。

萬幸係茹芸老公感受到佢極度沮喪情緒，特地帶佢去旅行療傷，茹芸喺旅行嗰陣諗起同媽媽過往相處點滴，引用一行禪師嘅話「雲朵即便不在，也會以雪或雨的形式延續」抒發心情，走出傷痛嘅過程雖然好煎熬，不過茹芸望住天上嘅雲，彷彿睇到媽媽嘅笑容，令佢覺得母親隨時都在。

茹芸望住天上嘅雲，彷彿睇到媽媽嘅笑容，令佢覺得母親隨時都在。