姚焯菲離港在即變感性 被小菲象鼓勵短片搞喊

就快要返新西蘭繼續學業嘅姚焯菲Chantel，呢日就現身商場一個迎奧運活動，吸引咗大批小菲象嚟到撐場，佢哋仲畀咗個大大嘅驚喜Chantel，搞到Chantel感動到眼濕濕，邊睇邊默默抹眼淚呀。

Chantel日前現身一個商場活動，同一班小菲象見面

Chantel就話好感謝小菲象嘅支持，佢指讀書真係一啲都唔易，當自己喺新西蘭讀書時，曾經覺得好似事業同學業都好難兼顧，但當見到小菲象們畀自己嘅強心針、支持自己後，都會令佢有種好安心嘅感覺。

返到新西蘭後Chantel好快就要考試喇，佢話咁多科入面，數學對佢嚟講係最有難度，一班小菲象聽到後就即刻眾眾為佢加油打氣，搞到Chantel又爭啲再次感動落淚呀。

Chantel被歌迷一早準備嘅神秘短片驚喜到感觸落淚

不過Chantel今次返新西蘭就唔會再孤獨喇，因為佢嘅妹妹都決定去當地讀書，Chantel就話阿妹相當興奮，而自己亦戥佢終於可以解放而開心呀。

佢又提到妹妹即將都飛往新西蘭讀書，之後自己就唔會太孤單