王丹妮 羅孝勇巴黎為港隊打氣 夫妻蜜遊睇比賽憶中學熱血期

體壇盛事2024巴黎奧運正在舉行中，吸引世界各地嘅觀眾欣賞賽事，眾多圈中藝人都身在巴黎支持奧運。王丹妮Louise同羅孝勇Sheldon兩夫妻就把握四日假期，應品牌邀請旋風式赴巴黎，首次體驗奧運氣氛兼蜜遊，兩人更親身為港隊打氣。
王丹妮同羅孝勇應邀去到法國睇奧運。
Louise興奮表示人生第一次睇奧運真係感覺難忘，開幕禮雖然落大雨，但無阻觀眾同運動員嘅熱情 ，落住雨見證各個國家隊坐住船經過塞納河真係好浪漫同好有巴黎特色。睇住唔同嘅歌舞表演，巴黎鐵塔嘅幻燈show，最後仲有最喜歡嘅歌手Céline Dion驚喜現身，一路聽一路起晒雞皮。兩人之後喺現場睇比賽，親身體驗熾熱氣氛。
兩人為港隊加油。
Louise同Sheldon自去年底結婚後，因工作和讀書關係，平時聚少離多，所今次都好珍惜同老公共處嘅假期，覺得呢四日好充實又愉快。兩人睇完開幕禮之後，仲睇埋七人欖球、沙灘排球、游水、柔道等，行程非常緊湊豐富。Sheldon以前大學時候都有玩過欖球同柔道，所以佢都睇得特別興奮。不過講到最期待嘅項目，兩夫妻異口同聲係泳水，所以能夠喺現場大聲支持香港隊，為香港隊吶喊助威，興奮心情難以形容，同時希望香港隊可以繼續再創佳績。
王丹妮睇比賽時諗返起自己讀書嘅年代。
兩人都係運動愛好者，見到一班咁熱血嘅運動員令Louise回味讀書時期嘅自己，話自己因為個人生得比較高，手腳比較長，入讀中學嘅時都被運動方面嘅團隊招攬，曾經玩過划艇、長跑同埋排球隊，好記得每個禮拜有好幾日放學都不斷咁同其他戰友一齊訓練，諗返都係一段好美好嘅回憶。
王丹妮將連日嚟嘅照片放到社交平台。
而另外星二代沈月亦有喺網上出Post，與家人一齊到巴黎睇奧運，並興奮留言話首次現身巴黎奧運，欣賞第一項賽事七人欖球賽，流露出一副期待嘅樣子。