StarTalk一氣呵成版｜郭富城通過體檢再開騷 婚後巨變享受做住家男

郭富城Aaron相隔8年下月再踏紅館開騷，呢日喺《StarTalk》接受我哋嘅主播 許文軒 訪談，分享8年等待嘅心情，一直歌唱同電影雙線發展嘅Aaron原來喺呢段時間並無放棄開騷，中間幻想過四年會開到演唱會，點知一轉眼四年又四年，以饑荒嚟形容自己心情，所以好期待自己再喺舞台走上最高峰嘅一刻。

郭富城過往嘅演唱會都令人有目不暇給嘅印象

今次演唱會起用全新構思，搣甩過往《舞林》兩字，特意找來美國著名排舞師幫手為團隊排舞，雖然起成轉合跟以往截然不同，大量嶄新嘅舞步演出一定令觀眾眼前一亮，Aaron要應付呢啲場面一啲都唔簡單，騷前已經Body check咗冇問題。除咗體力挑戰，每每藝人面對戒口都係難關，幸好Aaron一向好自律，更一臉幸福分享成為爸爸後日常作息係一位點樣嘅住家男人，自從同老婆方媛Moka結婚後就已經戒咗以前最愛嘅打邊爐近七年。講到一對寶貝女Chantelle同Charlotte，Aaron就好開心話囡囡完全遺傳佢嘅基因跳舞同唱歌基因，仲偶爾會學爸爸跳舞，不過就唔係時常會表演畀佢睇。

已為人父嘅佢一提起寶貝女就一臉甜笑

Aaron喺歌單方面都落足苦心，會應歌迷要求唱一啲非主流歌曲，並率先透露有啲歌十幾二十年冇唱過。而多年前Aaron曾經自己創作咗首歌《脈搏》送給歌迷，今年係佢相隔30年再踏紅館，Aaron同樣憑歌寄意，寫咗首《您》回饋歌迷及紀念互相陪伴成長，仲會有簡單舞步可以同歌迷一齊互動，連Aaron兩個女兒都有學習，Aaron更笑指睇到阿女跳呢段舞時自己職業病上身，特別嚴厲睇佢哋有冇跳錯。

唔少歌迷都非常期待佢今次再有突破演出