StarTalk一氣呵成版丨張繼聰爆黃宗澤鍾意成熟型 傾育兒經嚇到Bosco要Touch Wood

近年黃宗澤 張繼聰 同 陳家樂已經成為江湖電影嘅代名詞，呢日阿聰同Bosco就嚟到《StarTalk》，同主持 王鎮泉 一齊傾吓佢哋主演嘅電影《紥職3》。

阿聰話今集嘅故事，係因為佢要幫戲中嘅妹妹林千渟籌醫藥費，因而穿櫃桶底而發生，最後兩個好兄弟為咗幫佢，搞到件事越嚟越複雜。相比起《紥職2》，阿聰同Bosco都話呢集嘅動作戲比以往嘅多，佢哋話其中ending嗰場戲係印象最深刻，又要塌竹棚，又有一鏡到尾嘅打鬥鏡頭，Bosco話直頭係錯少少都要重拍，而阿聰就指好彩出嚟嘅效果係有驚無險。
阿聰喺新作為妹妹林千渟奮力籌醫藥費

戲中有唔少群打戲，手腳難免會有瘀傷，但Bosco話呢啲小傷簡直不值一提，因為佢指龍虎武師嘅動作戲仲甘，所以佢哋啲小傷講出嚟都唔好意思呀。
三位主演入面，得Bosco一個係黃金單身漢，阿聰就笑言大家鍾意嘅對象年紀大不同：「家樂嗰個就手抱嘅，我嗰個就係6、7歲，即係女嘛，佢（指Bosco）嗰啲就成熟啲囉啲對象，廿零三十歲。」阿聰呢番說話，搞到Bosco都冇力招架。
單身嘅Bosco被阿聰句句窒住無力反擊

由劇集《幕後玩家》開始合作，去到而家嘅《紥職3》，Bosco同阿聰都可以互相接住對方嘅臨場爆肚，佢哋就話其實喺片場中都會同埋家樂一齊度橋，當中Bosco仲分享返當年同阿聰一度拍劇嘅經歷。

香港電影出產過唔少經典嘅江湖電影，阿聰就話自己畀呢啲電影影響唔少，好似今次拍《紥職3》時喺片場見到鄭浩南，心入面成日都會有一句OS：「加錢！要唔要加錢呀？」，又試過同對方講：「銅鑼灣得一個浩南，就係你！」完全聽得出阿聰係個資深電影迷。
江湖電影當然唔少得鬧市打鬥場面

戲中三位主演有一場被鄭浩南家法伺候嘅戲，有傳鄭浩南打佢哋3個所用嘅力度有所不同，阿聰就話對方打自己嘅聲響係比其餘兩人較沉實，笑言feel到打背脊啲聲喺前胸出，搞到在場眾人大笑。

Bosco亦指自己細個都睇唔少江湖片，當中最深印象嘅係周潤發嘅雙槍畫面，佢又分享兒時住啲屋邨成日都會有人打鬥，而呢個時間Bosco媽就會捉住Bosco一齊睇，從而教佢唔好學壞。

講到對小朋友嘅教育，身為資深爸爸嘅阿聰，話自己都仲學習緊。至於單身嘅Bosco就話自己冇諗過會有小朋友，但如果個天畀佢嘅，佢都會盡力去教好個小朋友，但講完就急急去Touch Wood嚟規避風險，而當阿聰想講多兩句時，Bosco即閘住對話：「唔好安慰唔好解釋！呢個話題太哲學喇！」相當搞笑。