全城撐奧運｜劍擊奪兩金遊泳一銅全城同歡 劉穎鏇將加入任主持狂做功課

港隊喺巴黎奧運至今獲得歷來最佳成績，全城都感受到運動員嘅努力成果，而各區商場直播亦吸引唔少市民齊齊睇直播感受更好嘅氣氛，呢日幾位奧運之星、年青歌手、中聲唱將同應屆港姐候選佳麗就齊齊現身同大家一齊睇一齊為運動員打氣喇。

大班歌手藝員一齊到商場為健兒打氣

劉穎鏇 黃庭鋒 何泳芍 何沛珈 冼靖峰 黃洛妍 羅啟豪 顏米羔 支嚳儀 仲有15位候選港姐，呢日為港隊打氣之餘，亦即場獻唱為大家提供更多娛樂。大家都對江旻憓成功封后，同張家朗再次勇奪金牌非常興奮，而佢哋得獎嘅感言就更加令幾位奧運之星最為感動。

Tiffany即將會加入協助主持節目，所以自奧運開始之後佢已經瘋狂留意節目細節，又晚晚做足功課喇。

Tiffany已為加入主持做足準備

港隊運動員努力不懈爭取好成績，佢哋同所有支援人員都非常值得大家尊敬，而Archie就非常敬佩佢哋每一位喇，至於Ramon亦指運動員付出嘅犧牲難以相像，所以非常為佢哋所有人驕傲呀。至於Venus就話雖然晚晚捱夜睇比賽黑眼圈都出埋，不過單單睇香港兩大劍神嘅比賽就已經抵返晒咁話呀。

應屆候選港姐亦有出席呢晚活動

至於一眾候選港姐，好似 7號秦冀雯 8號盧凱怡 同 12號鍾翠詩 雖然要面對選美嘅緊密日程，不過就依然有抽時間睇比賽，加上秦冀雯係江旻憓嘅中大師妹，身為校友就更覺榮耀喇。