方力申上載奧運採訪花絮 與黃翠如冒雨四圍搵位直播

方力申同黃翠如早前出發去巴黎採訪奧運，難得去到當地，佢哋就梗係有拍片紀錄低啦！呢日小方就將當日出發去拍攝開幕禮前嘅片，剪輯成花絮擺上社交平台同大家分享。
開幕禮當日不停落雨。
奧運舉行期間，因為安全問題，巴黎有唔少地方都實施封路，所以開幕禮當日小方、翠如同攝製隊，晨早就已經要由酒店出發去會場。不過開幕禮當日天氣就不似預期，不時會落起雨，加上封路同攝製隊要喺唔同地方做直播嘅關係，佢哋要拎住器材冒雨行去唔同位置，搞到相當狼狽。
小方同翠如喺開幕禮當日不斷搵位做直播。
而喺第一次直播前，由於攝製隊搵唔到租賃嘅直播位置，所以要臨時轉場去到另一個高台做直播，由於做直播嘅鐵架有成幾層樓咁高，令畏高嘅翠如驚到不停落淚，拍檔小方就一直安慰住佢。
翠如佢哋喺河邊搵位做直播。
之後直播開幕禮、代表團坐船入會場時，翠如就表示因為佢哋冇錢買飛嘅關係，所以就喺河道旁搵咗個免費位觀看，雖然佢哋搵嘅位置要河有河、要巴黎鐵塔有巴黎鐵塔，但美中不足嘅因為係露天，所以佢哋要冒住雨嚟觀看，難怪翠如話好羨慕河道兩旁嘅居民，可以喺屋企嘅露台飲住紅酒嚟睇奧運開幕啦！
小方條花絮片揭外景隊有幾辛苦。