鄭秀文孖老公許志安遊東京 銀座食嘢掃貨勁Chill手挽兩袋戰利品

天后鄭秀文（Sammi）早前完成13場紅館個唱，喺慶功宴已大開食戒，終於有時間放鬆一下，Sammi近日孖老公許志安出發東京，同行仲有好友崔乘飛（Faye）及一名男友人。

Sammi近日出發東京嘆美食！

連日Sammi有喺社交平台跟歌迷們分享佢嘅美食之旅，雖然佢上載嘅影片未見安仔身影，不過噚日就有內地網民喺東京偶遇Sammi。有網民噚日先喺銀座一個購物商場見到Sammi與好友Faye忙於shopping，呢位網民大讚Sammi好白好瘦，聲音又好聽，相中見Sammi已手挽兩袋戰利品。

連日Sammi有喺社交平台跟歌迷們分享佢嘅美食之旅，雖然佢上載嘅影片未見安仔身影，不過噚日就有內地網民喺東京偶遇Sammi。

另一網民喺銀座街頭見到Sammi同安仔，似係Sammi行街掃完貨，之後會合老公安仔食嘢醫肚，當時過緊馬路，網民稱見到Sammi狀態同笑容好開心，不少網民憑呢張背影相已認出Sammi同安仔，而安仔仲貼心幫Sammi孭住袋戰利品。

有網民噚日先喺銀座一個購物商場見到Sammi與好友Faye忙於shopping，另一網民喺銀座街頭見到Sammi同安仔，似係Sammi行街掃完貨，之後會合老公安仔食嘢醫肚。

Sammi早排為咗喺演唱會以最佳狀態見歌迷，佢足足戒口5個月，終於完成目標，佢嘅東京之旅簡直係胃部放題，包括食刨冰、鮑魚﹑雞肉toast、內臟及鰻魚飯等。Sammi噚晚拍片講自己一直期待呢次旅行，成功完成個唱後，佢覺得好滿足。

許志安早前喺老婆Sammi演唱會上擔任嘉賓，以鋼琴伴奏並合唱《世紀末煙花》，二人雖然喺台上分開企，不過二人台下好甜蜜，有內地歌迷影到安仔拖住Sammi入紅館。

Sammi笑指此行有帶運動衫同鞋，如果朝早起到身都想做少少運動，不過Sammi坦言：「有啲懶惰，只係想食嘢，好Chill，食好多嘢、又唔諗嘢。」唔少歌迷支持佢，叫佢開懷大嚼，好好放空休息，而Sammi又指噚日遇上幾位市民，不約而同走過嚟，話非常喜歡睇騷；Sammi認為呢個係最美好嘅回報。