效力TVB共35年 監製王心慰榮休晚宴星光熠熠

早喺1976年就投入電視行業，效力TVB總計35年嘅監製 王心慰 ，早前宣布榮休。Amy姐多年嚟製作嘅《烈火雄心》、《天幕下的戀人》、《巨輪》、《忠奸人》同《黃金有罪》等都令觀眾留下深刻印象，亦為唔少藝人帶嚟機會。

曾製作多部知名劇集嘅監製王心慰榮休

呢晚一眾台前幕後出席榮休宴，為Amy姐送上祝福場面非常熱鬧，好似鄭嘉穎同太太陳凱琳、邵美琪、方中信、姜大衞、車婉婉、徐榮、黎燕珊、賴慰玲、樊亦敏、楊明同莊思明、唐詩詠同埋譚凱琪等等。

現場以佢過往嘅作品海報佈置

Amy姐話同嘉穎合作得最多次，經常比好多難度佢挑戰，而一直視Amy姐為事業上貴人嘅嘉穎，就話其實同Grace經常同Amy姐見面，仲話如果無Amy姐就無自己，喺晚宴上嘉穎仲向Amy姐獻吻，答謝對方多年提攜，又祝願Amy姐榮休生活更精彩。

大批過往曾合作嘅藝人都有參與呢晚榮休派對

而專程飛返嚟香港出席晚宴嘅邵美琪，當年就曾經同Amy姐合作過《第三類法庭》，Maggie話Amy姐工作時親力親為，對演員亦相當貼心，至於有傳Maggie將會回巢拍劇，Maggie就否認有咁嘅事，但係佢就話如果拍兒童劇嘅話可以考慮下。

邵美琪更係由外地趕返香港出席

至於馬神亦好多年前已經同Amy姐合作，佢話合作過程非常開心，更大讚Amy姐係一個好樂意提攜後輩嘅監製。自稱細細個已經拍Amy姐作品嘅方中信，就送上最真誠嘅祝福，希望佢好好享受榮休生活，至於會唔會再返TVB拍劇? 方中信就話一切視乎劇本，如果合適嘅話，都唔排除呢個機會。

馬神曾多次與Amy姐合作唔同作品方中Sir仲指如有合適劇本隨時會再現電視劇

呢晚亦有未能到場嘅藝人拍片道賀，好似陳展鵬、袁潔瑩等等，Amy姐見到大家咁鍚佢，佢都相當感動同開心，又話呢晚咁多藝人出席，係自己最好嘅成績表，證明自己都幾受大家歡迎。

幕後同事亦準備禮物歡送Amy姐

Amy除咗收到好多同事送嘅禮物之外，早前佢更獲主席許濤同埋珍姐送上金牌，Amy都好開心自己多年嘅努力得到認同。Amy話榮休後，自己會專注家庭生活，做好屋企嘅管家工作，仲話好希望可以好好鑽研食譜，煮好多美味嘅菜式比家人享用，佢仲話老公等待咗佢多年，而家終於都可以交人，同家人好好享受生活。
早前Amy姐獲主席許濤頒發金牌作紀念