四大台慶劇輪流上陣劇力萬鈞 廉署成立半世紀《廉政》 加碼肅貪

仲有大約一個月就到 TVB 嘅57周年台慶，今日官方正式公布年度四大台慶劇，包括已經播映中嘅《企業強人》，仲有緊接上場嘅《黑色月光》、《巾幗梟雄之懸崖》、以及《廉政行動2024》。

《黑色月光》由相隔6年重返無綫劇集演出嘅 楊茜堯 林夏薇 王浩信 等領銜主演，楊茜堯更會上演最黑暗嘅復仇戲碼；《巾幗》系列亦載譽歸來，第四季《巾幗梟雄之懸崖》由 黎耀祥 胡定欣 主演，亦係金牌編審 張華標 重返TVB操刀之作。
楊茜堯時隔6年將重現TVB劇集《黑色月光》

而進入結局周嘅《企業強人》由 陳豪 譚俊彥 龔嘉欣 同 張曦雯 主演，面對重重危機嘅陳豪，最終能否逐一擊破化解？ 
到底陳豪同譚俊彥是敵是友？

至於由TVB同 廉政公署 聯合製作嘅《廉政行動2024》，由 曾勵珍 羅香蘭 監製， 高子彬、麥浩邦、吳品儒執導，將於10月21日起一連五晚播出，主演陣容有 陳山聰 張曦雯 鄭則士 羅子溢 羅天宇 徐榮 蔡潔 韋家雄 阮浩棕 鄭俊弘 林凱恩 陳星妤 許俊豪 及容天佑 等。
《廉政行動2024》將喺21號起播出

適逢今年係廉政公署(ICAC)成立50周年，全新一輯《廉政行動2024》別具意義，新一輯更邀請三位電影導演加持，分別係曾拍攝《殺出個黃昏》嘅高子彬、執導過《逃獄兄弟》系列嘅麥浩邦、同《驚心破》嘅導演吳品儒。

劇集繼續以反貪污作主題，當中亦不乏埋身肉搏、飛車、槍戰等刺激場面。劇情圍繞首席調查主任 江見秋(張曦雯 飾)、總調查主任司徒啟文(陳山聰 飾)率領嘅團隊，佢哋帶領高級調查主任羅賓(鄭俊弘 飾)、調查主任阿南(容天佑 飾)、李梓樂(許俊豪 飾)，仲有兩位ICAC新丁丁芯 (陳星妤 飾)同鍾巧玲(林凱恩 飾)調查多宗涉嫌貪污案件。
首席調查主任江見秋同總調查主任司徒啟文帶隊深入唔同案件

劇中五大單元分別係「違．修」、「獄中人」、「沉默者」、「一念間」以及「偽謊者」，演出陣容仲包括影帝級人馬鄭則士 以及羅子溢、袁偉豪、蔡潔、韋家雄、文雪兒同馮皓揚等，一眾好戲之人雲集大晒好演技。
鄭則士亦有份參演

兩大主演陳山聰、張曦雯今次同樣係首度參與《廉政》系列，身為視帝嘅山聰過往多次飾演唔同政府部門人員，而ICAC則係初體驗，佢喺花絮片透露：「希望今次可以盡我所能去發揮，因為有好多對白要講，希望背熟啲！」不過山聰就被有超多人名嘅對白考起，身為視帝一樣硬食多次NG，最後仲忍唔住話：「真係人都癲！」
拍攝時大量唔同人名搞到經驗豐富嘅山聰都叫投降

而張曦雯飾演嘅江見秋外表冷漠、不苟言笑，對年輕調查員要求嚴格、毫不留情；然而大家最終都明白佢嘅出發點係對反貪使命嘅堅持。劇中嘅張曦雯係孕婦，要長時間戴假肚拍攝：「事前有觀察大肚婆點行路，喺街度見到大肚婆，就會睇住佢哋點行，所以佢哋都應該覺得我好奇怪！」Kelly仲笑言發現戴假肚有好處，更搞笑話同打機有關：「戴住個假肚打機，可以用嚟『浪』個手掣，好啱位。」

Kelly唔止係總調查主任，劇中仲係一名孕婦