莫文蔚演災難戲情緒久未能平復 獲劉德華大讚：我哋誕生個影后！

集結劉德華、白宇、莫文蔚 Karen、謝君豪、王菀之 Ivana、王丹妮 Louise等演員演出，以「香港首部以輻射災難」為題材嘅電影《焚城》即將喺11月上映！電影劇組釋出嘅最新「官員篇」預告片、人物海報以及「災難應變」製作特輯中，不乏緊張刺激嘅政治對立和災難應對場景，一眾金像級演員將危機中嘅人性掙扎演繹得淋漓盡致。

劉德華同莫文蔚喺戲中對立。
 
華仔同Karen呢次自《童夢奇緣》後時隔19年再度合作，有別之前飾演母子，今次兩位喺戲中各有立場，有多場舌劍唇槍嘅對手戲，Karen飾演嘅代理特首Cecilia同華仔飾演嘅環保專家范偉立，就撤離計劃展開激烈爭執，雙方立場對立，戲劇張力十足。當面對政府內部官員無動於衷，華仔激動斥責：「你地坐喺冷氣房，究竟知唔知下面有幾危險？」
 姜大衞（中）於戲中飾演特首。
戲中Karen臨危受命，代替特首（姜大衞 飾）主導救災計劃，並封鎖輻射洩漏消息，即使同華仔意見相反但仍然堅持己見，展現懾人氣勢。喺另一幕地下室重頭戲，眾人面對絕望嘅災難消息時情緒崩潰，場面動容，Karen喺cut機後更久久未能平復情緒。華仔安慰Karen之餘又讚賞佢喺戲中極富層次嘅演技：「我哋誕生個影后！」至於Karen 就話，今次連環拍攝激動場面非常過癮：「拍攝係順住劇本拍，有少少似演話劇咁，一埋位你就要全程投入，一氣呵成咁，好似一口氣拍晒成齣戲咁，哈哈！」

Karen拍完一場戲後，情緒久久未能平復。
過去一年先後獲金馬獎及金像獎提名嘅林保怡Bowie，今次戲中飾演消防處處長，佢講到拍攝多場情緒高漲嘅場面需要投入相當多精力，每場戲都充滿挑戰：「一cut咗機，大家都要紙巾索返啲眼淚，甚至係有啲鼻水啊，非常吃力。」Bowie又指各演員在片中需要想像去投入災難場景，表現出面對未知恐懼的真實情感，對演技要求極高。
 鄭則士喺戲中飾演保安局局長。
另一位重量級演員，就係兩屆金像影帝鄭則士，喺戲中飾演保安局局長嘅Kent哥，大讚電影中緊急危機應變小組嘅成員好有演戲實力以及表現得好稱職。同屬小組成員嘅仲有兩屆金像獎最佳女配角嘅Ivana，戲中飾演財政司司長政治助理嘅佢就喺煞科日同各位演員合照，非常榮幸同一眾好戲之人同場演出。
 90年代男神王敏德。
緊急危機應變小組陣營嘅仲有金像獎最佳女配角暨今屆金馬影后提名區嘉雯、香港劇場界資深演員白耀燦、實力派演員張松枝，還有驚喜客串嘅郭偉亮、張達倫，每位演員都非常投入，詮譯角色面對災難時嘅內心掙扎。而作為兩大90年代男神嘅王敏德、周文健會飾演成場輻射災難嘅關鍵人物，令影迷相當期待！