古淖文個唱尾場哭成淚人 感激父母一直包容自己

古淖文一連兩場嘅澳門演唱會日前圓滿結束，除咗佢嘅父母到場支持外，仲有肥媽、拉姑、陳淑芬、黑妹同《中年好聲音2》嘅隊友嚟到撐場，尾場請嚟譚輝智擔任嘉賓，二人合唱林子祥嘅《這一個夜》，令到全場沸騰。
尾場古淖文請嚟好友譚輝智任嘉賓。有輝智就會有拉姑。
演唱會上古淖文先後以英文、葡文、粵語同普通話獻唱多首經典歌曲，對於衣錦還鄉、喺主場舉行自己首個個人演唱會，佢感觸表示：「今晚對我講意義非常重大， 除咗係人生第一個演唱會，仲係喺自己出生地方到做，好開心！Home代表屋企外，舞台亦係我屋企，每次返到舞台我都會好溫暖、自在安心嘅感覺，自己都唱咗十幾年歌，今晚會有啲私心唱啲自己嘅歌曲，有我首支派台《古著》，亦有我有份作曲的《United》，想講你無論喺邊個地方嚟、邊個種族，大家都係同一屋簷下，澳門就係一個共融地方。」
可以返到主場開騷，古淖文相當興奮。第二場在唱出《完全因你》時，古淖文因為感觸邊唱邊落淚。
對於可以圓夢舉行個唱，古淖文逐一感謝支持自己嘅fans、一直包容佢嘅父母，以及兩個重量級人物：「今時今日有兩場演唱係非常之困難嘅事，我好感恩再次去接到呢個機會，記得有位前輩同我講，人生有好多機會，只要你把握到呢個機會，一個機會你就會成功，呢句說話係阿媽Maria Cordero教我。」古淖文又指而家更加學識愛自己，要去認識同聆聽自己內心：「好感恩我繼續努力讓自己進步，當中係有人會快、有人會慢，但就好似我天上偶像梅姐（梅艷芳）所講『只要有信心，冇難事！』共勉之。」
Encore時古淖文再次淚崩舞台。
而喺Encore環節，古淖文更哭成淚人，台下歌迷見狀即為其打氣，最後古淖文再次深深躹躬感謝眾人。
古淖文父母都有到場支持囝囝。《中年好聲音2》拉隊到澳門支持古淖文。古淖文同肥媽都喊到眼紅紅。