周吉佩夥古淖文Venus米羔 北美三場演出反應熱烈

周吉佩 支嚳儀 古淖文 同 顏米羔 四位中聲唱將，齊齊飛到北美參與三場演出，喺首站多倫多嘅見面會，嚟捧場歌迷一早塞爆商場，隨後喺三潘市同洛杉磯嘅兩場演唱會更加係座無虛席，佢哋亦好珍惜今次演出機會，不時跟北美歌迷互動同影相留念。

顏米羔、古淖文、周吉佩同支嚳儀早前到美加演出

首次到訪北美嘅吉吉表現相當興奮，佢話此行仲首次乘座無人駕駛的士。German就話北美歌迷好熱情，好感激大家一直對《中年好聲音》嘅支持。以往曾經喺三藩市讀書嘅Venus，完全無諗過有機會喺當地演出，感覺非常奇妙。曾經到訪過三藩市幾次嘅米羔，就話今次身份唔同，以往係影人，今次就係演出時被影相。

加拿大嘅見面會同美國兩場表演都大受歡迎

北美嘅演出上，佢哋除咗獨唱，更有不同組合演出，講到四人係咪最夾嘅工作同玩樂拍擋時，German就話只係今次咁啱得佢哋四個，其實中聲一、二任何同學都可以互相組合，同樣會好合拍精彩。吉吉認為今次係《中聲》北美演出嘅起步，相信將來有更多不同組合出埠演出。完成北美演出，佢哋計劃喺洛杉磯嚟個Busking，不過呢個計劃之前，佢哋就獲得幾日時間喺當地放假玩樂，享受難得嘅假期。

佢哋仲認為往後《中聲》唔同成員會有更多機會到海外為大家表演呀