譚輝智惠州登台獲粉絲組團拉票 入圍新人獎感覺回春有活力

中聲2唱將譚輝智日前去到惠州演出，後援會除咗人到，仲送咗個驚喜畀輝智，組成20人拉票團，帶埋banner幫入圍《萬千星輝頒獎典禮》「最佳男新人」嘅輝智拉票，搞到輝智又驚喜又感動。
譚輝智日前去到惠州演出。
輝智話估唔到自己到咗呢個歲數，仲可以提名新人獎，覺得自己已經贏咗，尤其見到其他入圍者都係20幾歲，覺得自己都好似多咗好多活力。佢亦多謝一班粉絲幫佢落力拉票，至於對獎項佢亦有一定信心。
輝智落力獻唱。
輝智為咗今次嘅演出準備咗特別歌單，獻唱之前少有演繹嘅歌曲，包括《吻別》、《千愁記舊情》，同埋自己嘅歌《多麼感激》，佢亦大讚當地歌迷相當熱情。
Fans為輝智拉票。
輝智話踏入2025年最希望可以出多啲歌，至於演唱會就希望可以有多啲作品之後先再考慮。