馮素波80大壽丨七公主沈芝華陳寶珠薛家燕到賀 波姐收阿仔新抱禮物甜在心

波姐馮素波從影超過70年，今年係佢80歲大壽，一班契仔契女為佢筵開十幾圍賀壽，波姐嘅圈中好友及後輩都有到賀，「七公主」沈芝華、陳寶珠及薛家燕合體到場，佢哋受訪時表示早喺個幾月前已夾時間，大家姐大壽一定要嚟！
馮素波80歲生日。吳君如媽媽亦有到賀。
家燕姐祝波姐身體健康、越嚟越紅，寶珠姐祝大家姐賺多啲錢，沈芝華大讚波姐皮膚好，完全唔似80歲，家燕姐指結拜「七公主」一齊長大，難得而家仲係咁健康，大家又越嚟越精靈，講到七公主明年60周年，家燕姐本來提議去旅行，不過其他家姐話好攰，家燕姐決定一齊食餐飯，大家無所不談。
古天樂媽媽（左一）、佘詩曼媽媽（左二）呢晚都有出席。
歐陽震華、陶大宇、商天娥、劉雅麗、鄧英敏、安德尊、冬嬸、佘詩曼媽咪同古天樂媽媽等到賀，歐陽震華笑指波姐係佢認識嘅長輩當中比較夜瞓，有時半夜都見佢online，大宇讚波姐好多計劃好多搞作，而家先係新嘅開始，而眾人亦紛紛上台獻唱助興，波姐嘅兒子David及新抱專程由英國返港，收到阿仔嘅禮物，波姐都甜在心頭。
波姐嘅囝囝同新抱都有返港為波姐賀壽。