劉威煌演唱會獲中聲戰友撐場 台上放閃承諾愛太太一生一世

劉威煌 一連兩場演唱會圓滿舉行，喺圈中人緣極好嘅佢，嚟到尾場繼續有大批朋友支持，除咗中一、中二生，「輕鬆啲」嘅好兄弟譚輝智、顏米羔、甘永傑、梁浩賢、梁思傑、王嘉明同埋潘文龍，呢晚亦有上台同威煌合唱多首英文經典歌，氣氛熱鬧又溫馨，威煌亦鄭重多謝台前幕後所有人共同努力，先可以成就今次嘅演出。

劉威煌嘅兩場音樂會圓滿舉行一眾好兄弟台上台下都落力支持

呢晚嘅演出，台上台下一樣咁熱鬧，座上客古淖文同黃劍文，仲即興同威煌一齊jam歌，大家都唱得好盡興，氣氛直頭好似開party咁happy呀！

威煌仲落台搵古淖文同黃劍文Jam歌

威煌由《超級巨聲》唱到《中年好聲音2》，呢條路一啲都唔易行，威煌呢晚亦憑歌寄意，特登揀咗《感激我遇見》同《分分鐘需要你》，來答謝粉絲咁多年嘅愛戴。

威煌更喺台上向太太感激示愛

除咗粉絲嘅支持之外，當然唔少得嘅仲有威煌嘅賢內助，威煌話太太呢次真係幫咗佢好多，所以就算太太反對，佢都堅持要喺台上多謝太太，訪問過程佢仲高調放閃，承諾愛太太一生一世，真係冧死人呀！
一班老友齊齊到場打氣