吳文忻乳癌復發化療後拍片露面 分享抗癌之路與病友力拼癌魔

前港姐 吳文忻 Nathaliie（現名吳忻熹）日前接受雜誌訪問公開兩年前確診乳癌，經手術治理後，今年發現復發已達第三期，亦擴散至淋巴，現正積極接受化療及免疫治療，踏上抗癌之路。

Nathaliie喺18號於社交平台上載短片同發長文，親自交代接受化療後嘅狀況同心情，雖然明顯聽得出佢聲音沙啞同有幾聲咳，但精神狀態尚算唔錯。

Nathaliie發片已笑面對治療過程

Nathaliie情緒平穩地講述自己接受治療後中氣不足，將會面對甩頭髮情況，稍後可能要剃頭，自己唔想好似等死咁，會每日更新自己狀況，並指上星期做完第一次化療後好辛苦，周身骨痛，幸好仍然保持胃口及冇嘔嘅情況，都有擔心自己喺抗癌條路咁長點捱落去，所以喺製作食療過程中想分享給同路人，同時每日更新狀況可以令朋友知道佢嘅消息，一切嘅鼓勵同支持對佢嚟講都好重要，坦言令佢感覺冇咁死，亦成為自己一個生存價值。

Nathaliie同丈夫育有兩女，不時分享一家人嘅溫馨時光

而Nathaliie亦撰寫長文，記錄第一次化療和免疫治療嘅辛苦旅程，「今日吊針由一點到六點。中途血壓高度185，護士要停藥吊住鹽水先，過咗大半個鐘頭再驗血壓落返143先再繼續，有點兒嚇親我！今日第一日第一個Cycle身體反應感覺良好，沒有之前人們講的恐怖。但人們都說最恐怖的是第三個cycle之後，當白血球跌到好低嘅時候是最辛苦的，所以不敢太樂觀！」以及期間每日大約做啲乜，思緒有咩想法，以至8月13號接受第二次化療狀況，「吊完超…攰，坐的士回程中，我忍不住攤了在座位上，嚇親的士司機，問我有冇事。」

雖然化療過程不適，不過Nathaliie決定以正面迎擊

最後Nathaliie亦感謝傳媒及各界關心，現在需要專注處理自己身體，會趁有精神嘅時候，拍定片同大家share講吓感受，感恩大家關懷。

佢仲希望以自身經歷啟發外界