樊亦敏熱捧《我推的野男LIVE!》 激凸Chilam強大腹肌迷暈「三太」

TVB Plus 熱播中嘅節目《我推的野男Live！》，星期一晚邀請咗《愛·回家之開心速遞》「三太」 樊亦敏 做嘉賓，呢集輪到11號至16號嘅六位野男登場，包括11 號「激凸 Chilam」鄧家朗(Ron)、12 號「可遇不可求」梁景𡺤(Jason)、13 號「青筋波」張家揚(Ray)、14號「健美大師兄」劉振鑫(Ken)、15號「濃情大隻仔」劉梓謙(Curtis)同埋16 號「王師傅」王國昇(Mike)。

TVB Plus嘅《我推的野男Live！》每集都吸引唔少互動，呢集「三太」仲親自觀戰

六位野男先後登場展示一身肌肉，令現場女觀眾尖叫，「三太」亦唔例外，佢仲搞笑話︰「喺我世界，最緊要只有威哥(羅樂林)，今日嚟咗之後發覺威哥你都係返屋企唞陣先， 我真係要尖叫，好勁呀。」佢自爆雖然節目播咗兩集，但係佢一直都有追睇，睇到熱血沸騰。「三太」即場獲贈「至威貼紙」，送俾心儀嘅野男。

事先將揚會現身現場嘅三太，呢日連威哥都唔理呀

喺Show Off 環節，講到表現最吸likes嘅相信係14號Ken徒手將葉靖儀同伍韻婷當槓鈴舉起，重量超過200磅。不過最令「三太」心心眼嘅反而係11號Ron用健身滾輪避障礙物的環節，展示佢強大腹肌，呢位「激凸Chilam」更喺競技環節表現出色，事後三太仲幫忙抹汗以示鼓勵。

激凸Chilam要咁避障礙物，體能肌力真係唔簡單

雖然有三太加持，不過今集Likes王就係16號嘅Mike(右二)
雖然有「三太」加持﹐但最後嘅熱度排行榜，「激凸Chilam」只能以12.1萬likes屈居第二，16號Mike獲 33.4萬 likes，破紀錄暫時成為「likes王」。

《我推的野男Live！》星期一晚 21:30 星期二晚 21:35 TVB Plus 82台 現場直播