餅碎快閃澳門相聚魅力依然 Stephy爆Elaine入賭場被查身份證

早喺2002年時成立嘅9人女子組合Cookies雖然解散多年，但成員之間情不變，好似鄧麗欣(Stephy)、楊愛瑾(Miki)、何綺玲(Elaine)、陳素瑩(Gloria)四人，雖然各自為家庭及事業奔馳，唔係時常見面，但佢哋份屬識於微時嘅好友，每次見面都好珍惜相處。

Cookies嘅幾位成員難得共聚，仲見到甚少露面嘅Elaine同Gloria

近日Stephy就撇甩男友、Miki亦暫時放下家庭，聯同Gloria一齊過大海搵埋喺澳門長大嘅Elaine，快閃澳門一趟，著上小背心便服嘅佢哋其中一張喺電話亭前嘅留影，依然散發住青春魅力。見佢哋喺澳門吃喝玩樂大飽口福，又嘆海鮮、又食地道葡撻同甜品、仲有豪食魚子醬，又玩又食流露真摯嘅一面。

澳門長大嘅Elaine早已為人母，不過就非常凍齡，入賭場仲被查身份證

Stephy事後po相留言大爆趣事：「食得好飽，玩得好年輕，年輕到有人入賭場仲比人查身份證，好過份。」並感謝Elaine又做司機又做導遊帶佢哋食好西，「好彩有你，等你下次黎香港再年輕一番。」直接明示入賭場被查身份證嘅喺邊位，其實Elaine已經39歲並育有一對子女，但細細粒嘅佢望落真係一啲都唔似，仲帶住稚氣嘅面孔。

同樣已做媽咪嘅Miki一樣少女味滿瀉

而同樣已經係媽媽嘅Miki一直都充滿少女味，佢話三十小時澳門遊，突然加插了更多好味的，加時留澳門，食飽玩飽未訓飽，瞓覺可以留返香港先瞓，多謝大家安排，難得放假的一天。幾位放下身邊一切出走見面，姊妹情深。
Cookies成立轉眼已係廿多年前嘅事