鄧麗欣笑男友外型似李炳憲非阿Rain 吳君如張天賦談網戀靠想像

鄧麗欣早前大方認愛，同來自台灣嘅六呎型男蜜運中，呢日佢同吳君如、MC張天賦出席新戲首映，講到媒體話男朋友似韓國天王阿Rain，Stephy就話其實男友似李炳憲多啲。Stephy話自己不嬲冇諗住收收埋埋，唯一擔心係影響對方工作，希望大家畀多啲空間！
鄧麗欣、吳君如、MC張天賦出席新片首映。
呢套新戲講述君如飾演嘅名醫透過交友App識咗騙子MC，二人之間假拍拖真詐騙嘅故事，貴為影后嘅君如都話今次嘅角色難度好高，事關佢同MC幾乎冇對手戲，大部分時間都係對住部電話做戲，所以好靠想像力，但自己就唔會想像電話嗰頭嘅人係陳可辛啦！
MC話同君如、Stephy兩位姐姐合作後，令佢對姊弟戀改觀。
MC今次同君如、Stephy兩位姐姐合作，令佢對姊弟戀改觀，以往係鍾意妹妹嘅MC就搞笑話，而家覺得姐姐好似都唔錯喎！

近年唔少港產片好興去到戲院謝票，君如就話計劃中秋節謝票，因為人月兩團圓，被問會唔會派福利，君如笑指福利就冇，不過考慮吓派月餅！
Stephy話男友似李炳憲。