張馳豪 龔嘉欣MV中親密談情 鬧市宣傳新歌獲婆婆大讚靚仔靚女

張馳豪啱啱推出cover新歌《我沒想過會這樣失去你》，Aska呢日特登搵埋MV女主角龔嘉欣，齊齊出動去到鬧市宣傳，一班粉絲早早就去到現場守候，佢哋當然都有把握機會為萬千星輝頒獎典禮有份入圍嘅獎項拉票。
龔嘉欣 陪 張馳豪 一齊去鬧市宣傳。
Aska同嘉欣親和力十足，路過嘅婆婆見到二人都表現得好開心，仲大讚嘉欣真人靚過上鏡，而Aska亦話今次同嘉欣合作好開心。
婆婆讚 嘉欣同 Aska靚仔靚女。
不過MV中二人不乏親密互動鏡頭，甚至要披嫁衣，對初初唔熟悉嘅二人嚟講，不免會有少少擔心，嘉欣話當日第一個鏡頭就要展現二人好sweet嘅一面，好彩大家都好專業，嘉欣仲大讚Aska願意為戲豁出去，先可以拍出咁好嘅效果。
張馳豪早前搵咗嘉欣做MV女主角。
呢個相差六年嘅姊弟戀組合，睇上去毫無違和感，而現實生活中Aska同嘉欣亦都唔排斥姊弟戀，佢哋不約而同覺得可以溝通先至最重要，年齡不過係一個數字，唔需要太介懷。