周慧敏分享獨門瑞士卷減肥法 自爆強迫症發作幸獲倪震包容

周慧敏Vivian即將喺澳門開騷，近日抽空接受網台訪問，透露今次唔單止Rundown跟過往有分別，連歌衫都會好大轉變，Vivian希望透過演唱會同歌迷聚下，仲話有好多心底說話想同大家講。

即將於澳門開騷嘅周慧敏接受網台訪問

Vivian雖然已經56歲，但一直好似食咗防腐劑一樣，堪稱玉女掌門人保養得宜，更分享咗一個幾有趣嘅獨門減肥法，Vivian大方打開手袋，發現令人驚訝，竟然見到兩件瑞士卷蛋糕。Vivian笑指因為做演唱會，所以要減下肥，呢個就係減肥餐，起身之後食兩件，下午食兩件，帶多兩件係身，餓嘅時候就食，每日六件左右，呢個就係Vivian減肥一日食糧，間中仲會食吓麻辣花生同黑朱古力。

仲透露自己以獨門瑞士卷減肥法Keep Fit

原來Vivian多年來開騷前都係用呢個方法減肥，仲話已經達標瘦咗四磅，所以佢話自己嘅減肥方法係控制自己鍾意食物嘅食量。到演唱會當日佢就只會食兩隻煎蛋，加少少嘢，出場前一定會加四羹白飯，因為咁就會充滿力量。

近日佢仲同大家重溫唔少當年嘅經典造型

Vivian忙於籌備演唱會非常忙碌，自稱天生係個強迫症性格，凡事都要親力親為，又追求自己心中完美，所以連訓覺時間都減少咗。Vivian話呢個性格老公倪震都好清楚，例如叫老公幫忙手整電腦，老公就會話今晚一定幫你搞掂。Vivian又分享老公太了解自己，所以例如添置一啲家中物件，都知道佢有強迫症，習慣用咩牌子，一有異樣就會覺得唔妥，所以老公會偷偷買好多然後收埋。例如自己鐘意飲某一個地方出產嘅可樂，佢會買好多，但唔知佢收喺邊，總之屋企存貨差唔多飲完，佢就會補充。

又提到同老公倪震嘅相處方式