周慧敏宣布巡演成告別演唱會 坦言要留時間夠老公照顧家庭

周慧敏Vivian嘅世界巡迴演唱會澳門站於31號舉行，當大家以為佢再次活躍舞台，豈料Vivian喺想借呢次巡演嘅機會，親自到世界各地同歌迷告別，多謝大家愛護咗佢30年外，亦好好同歌迷共聚珍貴嘅時光。對於Vivian突然宣佈於今次巡演後，唔再做大型巡迴演唱會，搞喊在場唔少歌迷。

演唱會以勁歌熱舞打開序幕。演唱會甫開場以《自作多情》及連串快歌作揭幕，令全場氣氛瞬即沸騰。一輪勁歌熱舞後，Vivian同歌迷打招呼：「我對今次巡演真係充滿期待，內心喜悅要大爆發， 我好Ready啦，你哋Warm Up未？啱啱啲快歌，好似帶我返90年代 ，諗返我第一次個人演唱會《94美的化身演唱會》，嗰陣自己跳舞似機械人，有邊個睇過？」Vivian指歌迷們唔經唔覺已經跟咗自己30年，佢指呢30年人生充滿意想不到嘅事，同時都冇諗過自己會再企係舞台上，之後Vivian表示要唱出今次演唱會嘅第一首慢歌《台下女主角》，而呢首歌係送俾佢人生第一位支持者—天上嘅周媽媽。

Vivian喺舞台上分享自己嘅人生感悟。Vivian喺演唱會上同大家分享佢嘅人生感悟，每段說話都令歌迷相當感動，當佢唱完《肋骨》呢首歌後，分享09年自己成為人妻，同年亦係佢嘅人生轉捩點，因為信仰嘅關係，令佢慢慢拆毀自己嘅強悍，Vivian指當佢將個「我」字縮細後，發現好多嘢都唔同咗：「 特別我哋做藝人，好多時人哋將我哋放到好大，我覺得唔係一件好事，我放低『我』字，反而睇到自己好多不足。」Vivian話當誠實面對自己後，佢學識接受自己有糟糕、有軟弱嘅時候，同時亦發現一直喺佢頭上面嘅光環，再冇能力困綁住佢：「我喺裡面被釋放出來，得到真正嘅自由，所以我唔係女神，不過係一粒好細嘅鹽，有時會發下光嘅阿V，好嗎？」觀眾即以掌聲作為回應 。

Vivian指歌迷們都係佢嘅小天使。

而喺唱完張國榮為佢寫嘅《如果你知我苦哀》後，Vivian形容對方係佢肩上嘅天使、扶持過佢嘅前輩，所以會永遠感激對方。呢次Vivian邀請咗黃劍文擔任特別嘉賓，二人合唱三首歌曲，Vivian指同劍文呢位朋友係互相守護嘅同行者。

Vivian邀請咗黃劍文擔任嘉賓。

到嗚謝環節，Vivian放出重磅消息：「其實今次巡演同自己講，搵最純綷心表演，為愛我的人唱歌，人生去到唔同階段，追求需要都係會有好大改變。今次這個巡演，的確係每一場都是倒數時間。今次應該係我最後一次個人大型演唱會啦！」台下歌迷聞言，有人痛哭，亦有人大聲反對，而Vivian則強忍淚水繼續講：「因為我覺得時侯差不多啦，要專注自己照顧自己身體，照顧我家庭，貓仔都唔細啦...我想多啲時間陪貓仔，同先生希望有更多共處時間，你地應該理解，係咪？」

Vivian指今次演唱會將會係告別個唱。

眼見歌迷繼續大嗌「 唔可以」，Vivian只好安慰大家話自己並非唔再工作，只係想有多啲時間調節自己：「時間好快，錯過咗就錯過咗啦，好似今晚咁，好快就過，已經演唱會尾聲啦，要唱最後一首歌，我好想聽到大家，大大聲一齊唱《最愛》。」由於完騷後歌迷仍不斷叫Encore唔肯離開，所以Vivian只好再次出場，獻唱多六首歌先完結呢場演唱會。