林峯預告明年有機會回港開騷 大爆佘詩曼對唱歌冇信心

林峯最近忙住開澳門演唱會，呢日佢趁有空檔出席一個鐘錶活動，原來阿峯愛收藏名表，佢亦好著重分配時間，忙於工作之餘，仲要盡量分配時間陪伴妻女，而阿峯早前完成咗兩場演唱會，觀眾反應熱烈，被讚歌單好有心思，驚喜唱出《數碼暴龍3》主題曲《馴獸師之王》。

林峯呢日出席一個鐘錶活動。
阿峯感激製作團隊用心，好多意見都一拍即合，佢叫大家期待吓明年可能喺香港開騷，阿峯笑指因為好多觀眾係90後，好多都有聽呢首兒歌，阿峯希望大家睇演唱會最緊要開心。

林峯話明年有機會喺香港開演唱會。
阿峯喺第二場邀請佘詩曼做嘉賓罕有開金口獻唱，阿峯大爆阿佘對自己歌喉冇信心，又指阿佘好早應承幫手，但係阿佘一直冇交歌，阿峯鼓勵阿佘試吓唱，稱阿佘平時唱K都冇問題，阿峯話趁食飯成班兄弟喺度，當時大家播歌一齊幫阿佘揀唱邊首歌。
林峯話佘詩曼對自己嘅歌喉冇信心。