陳法拉擔正荷里活新作煞科 與華姐好友聚會顯神級凍齡

陳法拉 同金球獎影帝哥連費路(Colin Farrell)合演，改編自同名暢銷小說嘅電影《The Ballad of a Small Player》話咁快就已經完成拍攝喇，新戲个有奧斯卡金像獎最佳女配角泰達史雲頓（Tilda Swinton）特別演出，更係法拉繼《尚氣與十環幫傳奇》以及《哥斯拉X金剛：新帝國》後，又一部荷里活作品，更係首次擔正演出，真係未上映就已經令人非常期待呀！

陳法拉擔正嘅新作同哥連費路仲有泰達史雲頓等合作
 
原著小說故事講述一名賭徒飽歷滄桑同面對債務困擾，輾轉間決定喺澳門展開新生活，繼而發生可以改變人生嘅故事。雖然法拉未有透露飾演角色，不過喺開拍前就講過，呢次角色情緒比較複雜，需要分外用心落苦功，亦係一個新挑戰。

最近新片於香港同澳門拍攝，法拉同大家相處甚歡
 
電影喺香港、澳門兩地取景，法拉最近亦喺社交平台連環分享多張花絮合照，當中亦可見男主角哥連費路身影。法拉分享嘅照片可見，佢地亦走進富有生活氣息嘅舊樓區，法拉更相當鬼馬拎住晾乾毛巾影相。

法拉連環分享今次嘅拍攝幕後情況
 
而法拉除咗忙住做嘢，早前更抽空同一樣華姐出身嘅宋熙年同陳爽飯敍，宋熙年同陳爽都分別喺社交平台分享聚會照片同三人昔日舊照。令網民感到驚訝嘅係，即使已經過咗十幾年，但三位皮膚狀態仍然一流，簡直係逆生長級嘅防腐級凍齡！

又趁留港期間相約老友見面，好似參選華姐嘅同期宋熙年同陳爽
再加上當年今日嘅舊照