港姐女．遊記｜塞班玩齊飛天又潛水 麥美恩遇「老公」盈盈呻被賣豬仔

今屆港姐主題曲MV已經首播，公眾投票亦已正式開始，15位應屆港姐佳麗9月15號就會參與決賽競逐后冠，而早前佳麗分組到唔同地方拍攝外景製作嘅節目《2024香港小姐女．遊記》星期一起播出，由 馮盈盈 麥美恩 帶領  7號秦冀雯 8號盧凱怡 同 12號鍾翠詩 嘅塞班之旅打頭陣。

7號秦冀雯 8號盧凱怡 同 12號鍾翠詩嘅塞班之旅率先播出
第一集上天落海乜都玩行程相當豐富，三位佳麗換上泳裝親親魔鬼魚，細細粒嘅鍾翠詩初時表現驚青，熱身後就玩得不亦樂乎，7號秦冀雯就表現大膽，對魔鬼魚愛不釋手，仲同其中一條名叫「李小龍」嘅魔鬼魚結緣，佢仲笑言：「我抱佢時最乖，永遠都唔會郁，其他人抱就會郁。」而8號盧凱怡同樣玩得開心，仲話希望擁有魔鬼魚一樣滑捋捋嘅皮膚。

7號秦冀雯同魔鬼魚「李小龍」非常親密
之後佢哋兵分兩路，Mayanne同8號盧凱怡坐小型飛機翱翔天際，馮盈盈就同秦冀雯、鍾翠詩到藍洞浮潛。盧凱怡小型飛機之旅非常盡興，起飛後仲控制飛行：「我覺得揸飛機幾易，因為又冇燈，又冇塞車！我有新目標，我要買一架飛機！」機師仲話佢技術有9分。

8號盧凱怡獲機師讚技術不俗
而馮盈盈、秦冀雯同鍾翠詩就化身美人魚影靚相，雖然畫面唯美，但鏡頭後秦冀雯就頻嗌想嘔：「血氧唔係好充足， 搞到低血壓，全程好想嘔。」而另一焦點馮盈盈浮潛後素顏樣曝光，仲呻爆被製作組「賣豬仔」：「原來唔使化妝過嚟，因為上到水之後變到素顏咁，早知就唔嚟啦！」場面搞笑。

馮盈盈潛水後變素顏上陣，慘呻被賣豬仔
至於今晚一集，佢哋將分兩組駕駛跑車環島，完成拍下風景靚相任務，之後再交由黎諾懿評分，低分嘅一隊要被另一隊影低醜怪相，仲要設為手機背景直至旅程結束為止。

馮盈盈同秦冀雯、盧凱怡組隊，聲稱去過西藏自駕遊嘅秦冀雯負責駕駛，不過技術就勁水皮Cut線入彎時頻頻出錯，嚇到盈盈瘋狂尖叫嗌停。另一組Mayanne就載鍾翠詩風馳電掣，兩人 Chill爆大唱《越難越愛》。最終邊一隊要接受大懲罰？今晚自有分曉！

秦冀雯嘅駕駛技術似乎未能令FYY安心

之後佢哋再出海玩水上降落傘，秦冀雯同盧凱怡；馮盈盈同鍾翠詩分成兩組比併，期間要背誦歷屆港姐冠軍名字。不過最大亮點並非佳麗同盈盈喺高空嗌到拆天，而係坐快艇上食花生嘅Mayanne，因為佢被自稱係 「老公」嘅船伕狂撩，又親手送上定情手環，認真好艷遇！

之後三位佳麗再分組玩水手降落傘

三位佳麗之後喺營火會訴心聲，齊齊淚腺失陷爆喊，當中鍾翠詩坦言因 「華姐」包袱搞到壓力爆煲：「我覺得自己好冇自信，大家覺得我係華姐，講嘢又好似好官腔，我自己又好驚講錯嘢，好大壓力……..」
曾於溫哥華參選華姐再返港嘅鍾翠詩自認壓力爆煲

《2024香港小姐女．遊記》星期一至五晚 22:35 翡翠台