鄧小巧獲偶像林宥嘉驚喜贈歌 收大禮感覺似中咗頭獎

鄧小巧日前接受電台節目錄音訪問，宣傳由林宥嘉（Yoga）寫畀佢嘅新歌《神愛世人》，小巧透露Yoga驚喜贈歌嘅經過，直言感覺好似中咗頭獎。
小巧透露Yoga驚喜贈歌嘅經過，直言感覺好似中咗頭獎。

小巧去年宣傳歌曲嗰陣，曾向媒體透露恨與偶像Yoga合作，希望唱出對方寫嘅歌，報道出街後，Yoga粉絲將呢則新聞send畀Yoga，原來Yoga有上網搵小巧嘅資料，又聽小巧啲歌，小巧續道：「可能咁樣對我產生咗啲印象，我冇個人邀請佢，同佢亦冇交情，有日公司收到個電話，話林宥嘉寫咗首歌畀我，大家都好愕然。」

小巧去年宣傳歌曲嗰陣，曾向媒體透露恨與偶像Yoga合作，希望唱出對方寫嘅歌。

小巧覺得最神奇嘅係冇聯絡過對方，但偶像卻靜雞雞寫好咗首歌：「佢話係割愛畀我，同埋佢有同林家謙（監製）講過寫畀我，會問我係咩狀態，又會喺歌詞下面留言，暗地裡做咗好多嘢，然後畀驚喜我，我覺得我有啲似中頭獎。」
小巧覺得最神奇嘅係冇聯絡過對方，但偶像卻靜雞雞寫好咗首歌。

小巧為咗答謝Yoga，今年3月專程飛去台灣拜訪對方：「我見到佢就變成鵪鶉咁，未坐低已經送禮物畀佢，但大家傾咗好多偈。」小巧自爆去年見偶像時表現失態，「我一見到佢就話『4年前睇你演唱會我未結婚，但依家我結咗婚喇』，講完嗰刻已經想打自己，結唔結婚關人鬼事咩，但因為太鍾意佢，好想同佢講嘢，佢好有家教同好有禮物話『恭喜、恭喜』」。
小巧認為有冇結婚與人生係咪圓滿幸福唔一定係對等關係。

小巧覺得Yoga最吸引嘅係聲音悅耳：「佢音色好靚，用聲嘅方法好動人，唔單止慢歌，唱快歌都好有爆炸力，同埋佢台風好好睇，企喺度唱歌唔郁都咁好睇。」

鄧小巧與外籍男友「白先生」於2022在加拿大結婚，婚後鄧小巧曾搬去加拿大，後嚟白先生亦為佢搬嚟香港。