馮允謙年尾化身聖誕老人派新歌 Lonely Christmas幸得釗鋒相伴

馮允謙 趕喺2024年年尾舉辦簽唱會同歌迷happy together，而歌迷當然唔會令佢失望，火力全開熱情應援，現場氣氛熱烈。歌迷仲稱呼阿Jay為聖誕老人，事關佢每年聖誕前夕都會推出新歌，就好似送比粉絲一份聖誕禮物。

馮允謙日前現身簽唱會同Fans見面
阿Jay話自己對聖誕節情有獨鍾，不過佢今年嘅聖誕就似乎有小小lonely，因為佢屋企人已經飛返加拿大，連平時一齊住嘅細佬都離港，搞到佢要自己一個宅喺屋企，好彩最後有好兄弟釗鋒相伴，阿Jay先唔使孤家寡人過節。
幾乎孤伶伶過佳節嘅佢，好在得好兄弟釗鋒相約

不過阿Jay寂寞嘅日子就快結束，愛子心切嘅馮媽媽特登喺31號飛返香港陪佢倒數迎接新年。